DHAGEYSO:- GABAYGII “SHAN GEESLE” & Abwaankii Leegada Cali Xuseen “Cali Makaadsade”

Gabyaagii weynaa ee xisbigii Leegada, isla markaana ahaa horseed iyo halgamaa gobannimo-u-dirirkii, madaxbannaanidii iyo la-dagaalankii gumeystayaashii kala duwanaa   Cali Xuseen  Xirsi “Cali Makaadsade”.

Waxannu jecelnahay in aannu si gaar ah munaasabaddan ugu xusno oo ku soo qaadanno qaar ka mid ah maansooyinkii qiimaha iyo qaayaha badnaa ee Abwaanku ummada Soomaaliyeed kaga tagay, ummadaas oo maanta ku sugan xili dhulkoodii duulaan lagu soo qaaday,loona soo guntaday in galiyo gumaysi gayiga Soomaaliyeed.

Calanyahow shanta gees lihi
Ilaahay guul ha ku siiya oo
Cadowgaagu ha guura oo
Gurigaa lagu saaray
Waligaa ku gabow!

Galabtii lagu taagay
Guddidii soconaysay,
Qaar baa gowska qaniinnayoo
Gadaal kuu dhugan waayayoo
Gardarray ku socdaanoo,
Daday meel ku garaacdiyo
Gumeysi bay baratee,
Haddii laysku gadoodo
Quruun guudka madow iyo
Gaalay kaama rogto!

Maraakiibtan gudaysiyo
Dayuuraadka ka guuxiyo
Geeshash kuu diriraayiyo
Gaadh naftaada ilaashiyo
Aamminkaa rag gunaaxayoo
Goobtii laysku dileeystiyo
Goofafaa ka sameeyssa,
Guullaan kuu baryayaaye,
Geesahaaga ka buuxi!

Intaasi wayga gargaare,
Waxa aan gocanaaya oo
Gebigaaga ku fiican,
Haddaan laguu geli haynnin
Anigu kuu gabyi maayo,
Soomaali baan ged aqaan oo
Guubaabo iiga dhammatay oo
Geesi kuu diriraaya iyo
Gacal baanad lahayn.

Gafuurtaagga qabiilkiyo
Iyadoo is gubeysiyo
Geel ay qaaddo ha joogto’e
Iney kuu garbo yeesho
Ay giijiyaan xadhiggaaga
Marna taa garan mayso.

Sacabkaa la garaaciyo
Orodkaa la gucleeyiyo
Feestadaa gudaheenniyo
Farxaddaa lagu guuley,
Gamba kuuguma taallo
Garaadkaa ka hallaabayoo
Labadooda gacmood bay
Midba geed ku xidheene
Gabgabtooda ha eegin!

Intey kuu guntanayso
Shisheeye isku gudbeyso
Baarkii laysku guraayay,
Yaa gabdhaa ula dheeli?

Fatuuraadka guduudan
Qaar go’aa ka caddaadiyo
Kuwa aad goray mooddiyo
Qaar gadaasha u dhuubanoo
Ka dheereeya gamuunka oo
Aan la gaadhi karaynnin
Yey ku gaardiyayaane
Gobeey hay lala eego,
Ayaa kuu gurmanaaya?

Doqon looma gargaaro oo
Ra’yigaan geli haynninoo
Wax badan baan gogoshayda
Ciilkoodii gam’i waayaye
Ilaahay baa ku gargaariye
Gurboodka haatan kacaayiyo,
Nasriga Guulle ka sug!

Voice Of Somalia-SOMALI LEAKS.